LAOAG CITY – Maluksaw ni Barangay Chairman Lolito Pascual iti Barangay 32-A, Lapaz ditoy ciudad ti Laoag gapu ta saan nga isuna ti pakaiderderetsoan dagiti ayuda a maibunong kadagiti kabarangayan da.
Inpetteng na a dagiti nasao nga ayuda ket maiderderetso ken ni Barangay Kagawad Johnny Duldulao a kalaban na a para kapitan.
Inbatad na nga iti panangsalangad na iti kagawad ket insungbat ni Duldulao a saan a rumbeng nga isuna ti pagsaludsudan na rason a napan ni Pascual iti Congressional Office.
Nupay kasta, maipagarop a ti naibaga iti kapitan ket uray siasinno ket mabalin ti agkiddaw ti tulong para kadagiti kabarangayan da.
Mainaig iti daytoy, inpetteng ni Barangay Kagawad Duldulao ng awan ti pakainaigan ti mapaspasangasangan a Barangay ken Sang Kabataang Elections ti panagpili na kadagiti kabarangayan na nga agbalin a benepisyaryo kadagiti programa ti gobierno kas iti ibunbunong a relief goods ken ti ipatpatungpal a Tulong Panghanapbuhay sa Ating Disadvantaged/Displaced Workers ti Department of Social Welfare and Development.
Inpetteng na a kiniddaw na laeng a matulungan dagiti kabarangay na, banag a napatgan ket naikkan ti gundaway nga agpili kadagiti maipaayan ti tulong iti barangay da.
Immuna iti daytoy, nakaawat ti Bombo Radyo Laoag ti impormasyon a ti pagderderetsoan dagiti ayuda a maited iti nadakamat a barangay ket ni Barangay Kagawad Duldulao.
