LAOAG CITY – Naglikudan ni Barangay Chairman Jerry Lucas iti Barangay 59, Dibua North ditoy ciudad ti Laoag ti alegasyon a dagiti relief goods a naited iti barangay da ket naibunong kadagiti barangay kagawad.
Inpetteng ti kapitan nga awan ti kinapudno na daytoy gapu ta dagiti nasao a relief goods ket napanda indanun a mismo iti pagtaengan dagiti kabarangayan da.
Segun kenkuana, sapasap ti pannakaibunong ti relief goods gapu ta kada pamilya ti binunungan da, karamanen ti pamilya dagiti barangay kagawad.
Inpakaammo na a ti inggatang da iti relief goods ket aggapo iti calamity fund ti barangay da.
Nupay kasta, inbatad ti kapitan a ti relief goods nga aggapo iti gobierno iti ciudad ti Laoag ket naibunong kadagiti indigent a kabarangayan na ket awan uray maysa a kagawad na a nangala.
