LAOAG CITY – Manarimaanen ti panangiproseso ti Philippine National Police iti ili ti San Nicolas ti maipila a kaso a panaglabsing iti Republic Act 10591 kontra iti Barangay Chairman iti Barangay 15 iti nasao nga ili.
Daytoy ket kalpasan a natiliw a nagikot ti paltog kabayatan nga adda iti uneg ti videoke bar iti paset ti Barangay 16, San Marcos iti nasao met laeng nga ili.
Segun iti Philippine National Police, ti kapitan ket agtawen ti 76, naasawaan ken residente iti Barangay 15.
Inbatad ni Police Captain Sygman Benigno, ti chief of police iti ili ti San Nicolas, inwayat da ti Oplan Bakal kadagiti red light area partikular iti Barangay 16 ken nakita da ti kapitan nga agin-inom ken ti bag na a nakaparabaw iti lamisaan.
Kunana nga iti panangberipikar dagiti otoridad ket boluntaryo met nga inpakita ti kapitan ti paltog na.
Mainaig iti daytoy, kuna ni Benigno a naglabsing ti kapitan iti linteg isut gapo na a tiniliw da.
Nakumpiskar manipud iti kapitan ti maysa a Black Belt bag a naglaon iti Gloc .40 caliber pistol ken maysa a magazine nga addaan ti siyam a bala, ken maysa pay a magazine nga adda iti uneg ti belt bag a naglaon met iti 10 pcs live ammunitions.
Kabayatanna, kuna ti kapitan a kalpasan ti Christmas program da iti barangay ket napan nagkankanta gapo ta hilig na daytoy.
Inbatad na a saan na a ninamnama ti pannakatiliw na gapo ta saan na met nga inruar ti paltog na ken kumpleto ti dokumento na.
Inlawlawag na nga itay bigat ket naibaga met kenkuana a makaruar iti pagbalodan.
Iti agdama, nagtalinaed iti kustudiyar ti Philippine National Police ti nadakamat a kapitan.
