LAOAG CITY – Nagsurat ni Brgy. Chairman Ruben Roque iti Brgy. 46, Nalbo ditoy siudad ti Laoag iti Sangguniang Panlungsod maipapan iti pannakaapektar ti kalsadada.
Nagipasa ti surat ti Kapitan iti konseho gapu iti saan a panangtungpal ti SM iti inkarida a mangiestablisar ti sabali a dalan gapu ta naakoparanda ti agdama a kalsada no sadino ti napasamak ket akin-uneg metten ti perimeter fence daytoy.
Basar iti nailanad iti surat a manarimaan ti pannakaipasdek ti nasao a dakkel a mall iti barangayda ken naapektaran ti barangay road-da nga adda ti kalawana a nasurok-kumurang 1,000 square meters.
Naipalaon pay iti surat a napagtulagan iti nagbaetan ti SM ken iti maseknan a barangay nga adda ti maiestablisar a sabali pay a barangay road nga uppat a metro ti kalawana banag a saan a naipakat.
Naammoan a ti perimeter fence ti dakkel a mall ket maipaspasdek iti sakupen a lote ti Barangay Nalbo.
Mainaig iti daytoy, segun ken ni Vice Mayor Carlos Fariñas a ti nasao a surat ket pinirmaan dagiti amin a Barangay Kagawad ken Kapitan iti maseknan a barangay.
Inbatadna a mangipatulod ti surat met ti konseho iti City Engineering Office tapno maipakaammo daytoy a reklamo kenkuana ken mapan makisarita iti SM maipanggep daytoy a banag.
Inlawlawagna a maibasar ken ni Kapitan Roque a namin-adu a daras daytoyen a napan nakisarita iti dakkel a mall ngem saanda nga ikankano rason a napanunutanna nga idanon daytoy a parikotda iti Sangguniang Panlungsod.
Kabayatanna, kuna ni Brgy. Chairman Roque iti Brgy. 46, Nalbo ditoy siudad ti Laoag a temporario nga inpasardengna ti panangpaalad ti SM gapu ta maakoparan ti barangay road-da.
Inpalgakna a napagsasaritaanda idi a maiyakar ti kalsada gapu ta maakoparan daytoy ti maipatpatakder a dakkel a mall.
Gapu iti daytoy, immanamong ni Kapitan Roque a maipalaud iti nasao a kalsada tapno adda met laeng mausar a pagdalanan dagiti resident ken motorista.
Naammoan nga a napan kinita mismo ti lokal a gobierno ti agdama a situasion ti nadakamat a kalsada.
Kamaudiananna, inpakaammo ni Konsehal Jason Perera nga adu ti maapektaran a motorista gapu iti panangakopar ti SM iti nasao a kalsada isu a masapol nga adda ti mabukel a komite tapno idanon daytoy a banag iti City Engineering Office kadagiti pannakabagi ti maseknan a dakkel a mall.
