LAOAG CITY – Inlawlawag ni Barangay Chairman Gilbert Martillano iti Barangay 51-A, Nangalisan ditoy ciudad ti Laoag ti naidanun a reklamo ditoy Bombo Radyo Laoag.
Daytoy ket mainaig iti maipagarop a saan a panangipaay ti Barangay secretary da ti barangay certificate iti maysa a kabarangayan da.
Inbatad iti Bombo Radyo Laoag ni Kapitan Martillano a ti kabarangay da a ni Alwyn Marcel Deuz ket saan a nakaala ti barangay certificate gapu ta maipagarop a diktaran na ti barangay secretary nga event organizer ti maikabil iti sertipikasyon idinto a saan nga isu ti trabaho na.
Inpetteng ti kapitan a saanda a kanunungan ti panagswitik ti kabarangayan da gapu ta masapol a ti laeng pudno ti maikabil iti maaramid a barangay certificate a pirmaan na.
Inpakaammo ni Martillano a ti barangay certificate ket usaren koma ni Deuz tapno makastrek iti kapitolyo probinsyal para iti aniaman a trabaho.
Innayon na a ti paggaammo na ket aglaklako ti makmakan ni Deuz no adda ti piyesta saan ketdi nga event organizer.
