LAOAG CITY – Nakigtot ni Barangay Chairman Rodolfo Ramirez iti Barangay 55-B, Salet – Bulangon ditoy ciudad ti Laoag iti pannakaireklamo na iti City Council gapu iti maipagarup a gross negligence a naaramidan na.
Daytoy ket gapu ti maipagarop a saanna a panangipaay ti barangay clearance iti maysa a kabarangayan na.
Inlawlawag na a no adda dagiti mapan mangala ti barangay clearance ket maikkan a dagus malaksid kadagiti addaan ti pending a kaso wenno reklamo iti barangay.
Mainaig iti daytoy, inadmitir ni Ramirez, adda ti saanna nga inikkan ti barangay clearace a kabaranggayan na.
Binigbig na daytoy a ni Roel Ancheta.
Daytoy ket gapu ta ti daga a kayat da a paaladan iti ina na a ni Zenaida ket adda ti pending a kaso
Kuna ni Ramirez a ti nasao a daga ket a saan a bukbukod a kukua dagiti agina nga Ancheta gapu ta ipetpetteng ti agnagan ti Linda Riazo a kukua da nga agkakabsat ti nasao a daga.
Da Linda Riazo ken Zenaida Ancheta ket agkabsat.
Inbaga ti kapitan a namintallo a daras nga adda ti insayangkat da nga arraignment iti nagbabaetan dagiti maseknan ngem saanda latta a nagkikinnaawatan.
Gapu iti daytoy, napan nagreklamo iti DILG ni Roel Ancheta isu a pinaayaban da daytoy ket inlawlawag na ti rason no sapay a saanna nga inikkan ti barangay clearance ti nasao a nagreklamo.
Innayon na nga uray iti City Engineering Office ket inbaga da a saan a mabalin a piliten dagiti agina ti Kapitan nga ikkan na ida ti barangay clearance gapu ta masapol nga urnusen da nga umuna ti problema iti nagbabaetan dagitoy.
Naibaga pay ti nasao nga opisina nga uray iti opisina da ket saan da a mabalin nga ikkan dagiti agina ti building permit gapu iti nasao nga isyu.
Gapu kadagitoy, inpetteng ni Ramirez nga ar-aramiden na laeng ti obligasyon na kas ama ti barangay ken nakasagana a mangsango ti naipila a reklamo kontra kenkuana.
