LAOAG CITY – Inadmitir ni Barangay Chairman Joseph Palafox iti Barangay Sta. Cruz Sur iti ili ti Badoc a nadangran na ti sukir a kaanakan na nga inawagan na laeng ti “Mar-Mar” nga agnanaed iti agdama iti Barangay Milagrosa iti met laeng nasao nga ili.
Inlawlawag ni Palafox iti Bombo Radyo Laoag a rumuar sumrek ni Mar-Mar iti barangay da ngem awan pulos ti pass slip na a kasapulan nga iggem dagiti residente no rumuar da iti pagtaengan gapu iti maipatpatungpal nga Enhanced Community Quarantine gapu iti covid-19.
Inbatad na a namin-adon a daras a binalakadan na ti kaanakan na a mangala ti pass slip ngem maipagarop nga ipalpaliwaweng laeng ni Mar-Mar.
Gapu iti daytoy, kuna ti kapitan a gapu iti napalalo a pungtot na ket pinitik na ti lapayag ken agong ni Mar-Mar ken kinabil na buksit na.
Innayon na a saanna a naireport iti PNP ti problema na ken ni “Mar-Mar” gapu ta madi ti signal.
Inpakaammo ni Kapitan Palafox nga immunan nga inreport ti kapitan iti Barangay Milagrosa iti panangtiliw dagiti kameng ti pulisya nga agisaysayangkat ti checkpoint iti barangay da ni Mar-Mar gapu iti panagpaberber na ti motorsiklo na.
Nupay kasta, saan a nakadanun ni Mar-Mar iti checkpoint isut gapuna a saan a natiliw dagiti otoridad.
Kabayatanna, inpetteng ti kapitan a saan a pudno a napan nagpadespensar iti kaanakan na gapu iti panangdangran na kenkuana gapu ta inaramid na laeng ti trabaho na kas mangidaulo iti barangay da.
