LAOAG CITY – Inlawlawag ni Barangay Chairman Rodel Pacnis iti Barangay Victoria iti ili ti Currimao ti napasamak no apay a maipagarop a pinagsawsaw-an isuna ni Barangay Kagawad Jose Brandon Tabuy ken ti ina na.
Segun kenni Pacnis, kalpasan a nakaawat da ti direktiba manipud iti DILG seknan iti road clearing operation ket napan da nagsursur kadwa na ti secretary ti barangay agingga a nakadanon da iti balay ti kagawad.
Inbatad na nga idi adda da iti balay ti kagawad ket ti ina na ti nakasarita ti kapitan ken dinamag na no awan ti pagbilagan da a sabali ken ditoy metten a maipagarop a nagsasao ti ina ni Kagawad Tubay.
Kunana a bayat nga agsasao ti ina ken rimwar ti kagawad ken nakiraman a nagsasao ti dakes, ken maipagarop a linayatan na pay ti kapitan.
Inpetteng na a nagsasao latta ti madi dagiti agina agingga a timmawag iti pulis.
Mainaig iti daytoy, kunana a saan na a ninamnama a kastoy ti aramiden ti kagawad kenkuana gapo ta ammo ti maseknan ti mandar ti DILG seknan iti road clearing.
Naamoan nga idi kalman kuma ti panagsasarita da iti PNP no sadinno nga inimbitaran na pay ti DILG officer tapno mailawlawag ti mandar ngem saan a nagpakita dagiti agina.
Kabayatanna, itay malem ket isu manen ti nakaituding a panagsasarita dagiti maseknan.
