LAOAG CITY – Naminsan manen a nagrinnupak dagiti kapulisan ken protesters idiay Kenya.
Nagmartsa dagiti protesters iti kalsada ti Mombasa ti maikadua a kadakkelan a siudad idiay Kenya.
Naiget a panawaganda ti panagbaba iti puesto ni Kenyan President William Ruto.
Napilitan dagiti otoridad nga agusar ti tear gas ken dagiti armas kontra kadagiti protesters a simrek kadagiti opisina ti gobierno.
Agtultuloy ti tignay-protesta iti baet nga inrakurak ti Presidente ti Kenya a saannan a pirmaan ti nasao a gakat a gagem nga ipangato ti buis dagiti sumagmamano a kangrunaan a magatgatang.
Basar iti Kenya National Human Rights Commission a dumanon iti 39 a tattao ti pimmusay gapu iti tignay-protesta a nangrugi idi Hunio 18.
Kaadduan kadagiti pimmusay ket napasamak idi Hunio 25 no sadino nagusar ti paltog dagiti kapulisan kontra kadagiti protesters.
