LAOAG CITY – Nagun-od ni Karl Eldrew Yulo ti umuna a gold medal daytoy iti seniors level kalpasan a nangabak iti floor exercise ti FIG Artistic Gymnastics World Cup Series idiay Antalya, Turkey.
Nagballigi ti agtawen ti 18 a gymnast kalpasan a nakaala ti 14.100 puntos iti final round no sadinno a nakagun-od daytoy ti 5.3 iti difficulty ken 8.8 iti execution.
Maikadua ni Eamon Montgomery ti Ireland nga addaan ti 13.833 puntos para iti silver medal idinto a naala met ni Rayderley Zapata ti Spain ti bronze kalpasan a nakagun-od ti 13.333 puntos.
Ni Karl Eldrew ket kabsat ti two-time Olympic champion a ni Carlos Yulo.
Naglippas isuna iti maikapat a puesto iti qualification round sakbay a nangipakita ti napigpigsa a performance iti final.
Immunan a nangipakita ti napintas a performance ni Yulo iti World Cup leg idiay Baku, Azerbaijan ken nakastrek pay isuna iti finals ti floor exercise ken horizontal bar.
