LAOAG CITY – Natay ti maysa a karpintero kalpasan a pinaltu-paltogan ti saan pay a nabigbig a suspek iti Brgy. Napu iti ili ti Badoc.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, nabigbig ti biktima a ni Fernando Baldugo y Dahilig, agtawen ti 51, naasawaan ken residente ti Sitio Cabuan, Brgy. Napu iti nasao nga ili.
Inbatadna a basar iti inwayatda nga imbestigasion, kabayatan a mangmangan ti biktima iti pagtaenganda ket kellaat a pinaltogan ti suspek ti biktima iti namindua a daras babaen ti maipagarup a calibre 45 a paltog.
Inlawlawagna a kalpasan ti insidente ket dagus a naglibas ti suspek iggem ti inusarna a paltog a nagturong nga agpa-abagatan a laud iti barangay road iti nasao a barangay.
Mainaig iti daytoy, narekobre dagiti otoridad iti nakapasamakan ti krimen ti walo a kapsula ken uppat a bala ti calibre 45.
Naitaray ti biktima iti Mariano Marcos Memorial Hospital and Medical Center iti siudad ti Batac ngem pimmusay babaen ti attending physician a ni Dr. Japhet Resurreccion Caraang.
Naammoan a nagsagaba ti sugat ti biktima iti akinkannawan a barukongna ken akinkannawan a kidayna.
Kabayatanna, nagkiddaw ti Badoc Municipal Police Station nga idadauloan ni P/Capt. Elison Pasamonte para iti Forensic Unit iti pannakaiproseso ti insidente.
Iti agdama, manarimaan a kitkitaen dagiti otoridad dagiti Close Circuit Television wenno CCTV camera a nakaimuntar iti asideg iti nakapasamakan ti pammaltog para iti al-alisto a panagdur-as ti kaso.
