LAOAG CITY – Kinumpirmaran ni Mr. Jovencio Asuncion, principal 4 iti Central Elementary School ditoy ciudad ti Laoag a nagbuteng dagiti estudyante da ken uray dagiti mangisursuro kalpasan nga adda ti nakita a karton iti alad iti nagbaetan ti nasao a pagadalan ken establisimiento.
Inbatad na a gapu kadagiti maipadpadamak kangrunaan na iti social media seknan ti maipagarop a kaaddan dagiti terorista ditoy Region I ken agpabettak da kadagiti pampubliko a lugar ket inpagarop dagiti maseknan a bomba ti karga ti karton.
Nupay kasta, nakakatawa ti principal gapu ta kalpasan a napan kinita ti janitor da ket naduktalan a saan a bomba ti karga ti karton no di ket rugit ti tao.
Naamoan nga ita pay nga aldaw ti rugi iti eksaminasyon dagiti agad-adal iti nasao a pagadalan ngem gapu ti napasamak ket naladaw a nangrugi.
Kabayatanna, inbatad ni Police Lt. Col. Amador Quiocho, ti chief of police ditoy ciudad ti Laoag a nagturong da a dagus iti nasao a pagadalan apaman a naamoan da ti napasamak.
Inbatad na a mabalin a ti immunan a rinespondean da nga adda ti diperensya ti panagpanpanunot na ti napan nagiwara-wara ti basura ken inbati na ti karton iti alad a nakaalarmaanen dagiti nakakita nga agad-adal iti Central Elementary School ditoy ciudad ti Laoag.
