LAOAG CITY – Posible a balbaliw a maipila ti kaso a panaglabsing iti RA 10591 kontra kenni Louie Lardizabal, agtawen ti 45, awanan asawa, construction worker ken residente ti Brgy. Taggat Norte, Claveria Cagayan.
Ni Lardizabal ti aksidente a nakapaltog iti katrabahoan na a ni Warren Pillos, agtawen ti 45, awanan asawa, construction worker ken residente ti Brgy. Peralta iti ili ti Dingras.
Segun kenni Police Major Joseph Baltazar, ti chief of police ti PNP-San Nicolas, irefer da iti legal officer iti INPPO ti kaso a panaglabsing iti RA 10591 kontra keno Lardizabal kalpasan nga awan ti naipakita na a dokumento iti paltog na.
Inlawlawag na a basar iti palawag ni Lardizabal, ti paltog na ket nagatang na iti maysa a personalinad ngem saan na a kayat nga inaganan ti maseknan.
Nupay kasta, kunana a palutputen da a nalaing tapno mapagpudno da ni Lardizabal.
Ummuna iti daytoy, kinumpirmaran ni Baltazar a nadismiss ti kaso a Frustrated Homicide a naipila kontra iti suspek kalpasan nga insanud ti biktima ti reklamo.
Inpetteng ni Baltazar nga awanen ti serbina ti kaso a naipila iti piskalya kontra iti suspek gapu ta awan ti sabali a testigo malaksid iti nasao a biktima.
Inbatad na a pinakawan ti biktima ti suspek gapu ta agkatrabahoan dagitoy iti maysa a construction site iti ili ti San Nicolas. Maipalagip nga aksidente a nakalbit ti suspek ti paltog a calibre 9mm rason a natamaan ti akin-kannawan a luppo ti biktima.
