LAOAG CITY – Posible a sumango iti kaso a sedisyon dagiti indibidual a karaman iti naranggas a tignay protesta idiay Manila kagiddan iti pananglagip ti Martial Law.
Daytoy ti inrakurak ni Department of the Interior and Local Government Secretary Jonvic Remulla mainaig kadagiti naarestar nga indibidual ken iggem ita ti Manila Police District (MPD) ken nairaman iti babaen ti interogasion.
Immapela ni Palace Press Officer USec. Claire Castro ken ni Sec. Remulla ken Acting PNP Chief PLt.Gen. Jose Melencio Nartatez Jr. nga adalen no mabalin a kasoan ti inciting to sedition ni dati nga Ilocos Sur Governor Chavit Singson a nangallukoy kadagiti agtutubo tapno makipagpaset iti tignay protesta.
Inlawlawagna nga arig sinulisog ni Singson dagiti agtutubo a saanen a sumrek iti pagadalan imbes ket makiraman iti tignay protesta ken inallukoyna dagiti nagannak a baybay-an dagiti annakda a tumakder para iti maysa a rebolusion kontra iti korapsion.
Kuna ni Castro a kalikagum ni Presidente Ferdinand Marcos Jr. a mapagsungbat dagiti amin a karaman iti naranggas ken naringgor a tignay protesta kadagiti sumagmamano a paset ti Metro Manila a nagtennag pay iti panagdinnangran dagiti pulis ken sibilian.
Inbatad ni Acting Philippine National Police Chief Nartatez Jr. a posible a mabalin a mapilaan ti kaso a terorismo wenno panaglabsing iti anti-terrorism act dagiti adda iti likudan ti naranggas a tignay protesta.
