LAOAG CITY – Kinumpirmaran ni Police Captain Joseph Calderon, chief of police ti PNP-Dingras a maipila intono bigat ti kaso a panaglabsing iti Comelec Gun Ban ken RA 10591 kontra iti lalaki a natiliw ti checkpoint.
Ti natiliw ket ni Zyrel Rex Sampayan y Lasiste, 38, residente ti Barangay Guiset Sur, San Manuel Pangasinan, ken dati nga agnanaed idiay Amerika ngem naideportar ditoy pagilyan gapu ti kaso na a direct assault.
Segun kenni Calderon, basar ti palawag ti ama ni Sampayan, inkabil na ti kalibre 40 a paltog na iti uneg ti lugan na gapo ta ti anak na ket maipagarop nga adda ti deperensya ti panagpanpanunut na ken rimwar laeng iti mental hospital idi August 2018.
Inlawlawag ti ama nga indulin na ti paltog iti lugan tapno saan a maala ti anak na bayat ti kaadda da iti uneg ti balay ken saan na a ninamnama nga uray ti lugan ken inlibas ti anak na.
Kuna ti ama nga inreport na iti PNP-San Manuel nga innala ti anak na ti lugan iti oras ti 12:20 iti parbangon idi Abril 13, 2019 ken saan da ammo ti nagturongan na agingga a naduktalan da a natiliw.
Inpasingked ni Calderon a kumpleto ti dokumento ti nasao a paltog.
Kabayatanna, ninalakadan ni Calderon dagiti nagannak ni Sampayan nga ipresentar da amin dagiti rekord mainaig iti claim da nga adda ti deperensya ti panagpanpanunut ti anak da.
Daytoy
ket paset ti panagdependar ti kampo ni Sampayan iti maipila a reklamo
gapo iti inaramid ti anak.
Segun kenn Calderon, sabali laeng a kaso ti sangwen ni Sampayan iti panangitaray na iti nadungpar na ditoy ciudad ti Laoag.
Maipalagip a natiliw ni Sampayan bayat ti panag-checkpoint da idiay ili ti Dingras.
Nakumpiskar dagiti kameng ti PNP–Dingras dagiti 30 a bala a nakaikabil ti sikig ti driver’s seat, ti kalibre 40 a nakaikabil ti compartment ti nasao a lugan, ken nakaisuot pay kenkuana iti bulletproof vest.
