LAOAG CITY – Mamati ni International Criminal Court (ICC) Assistant to Counsel Kristina Conti nga addan ti 80% a matuloy ti kaso ni dati a Presidente Rodrigo Duterte nga agturong iti panangtingiting.
Daytoy ket kagiddan ti desision ti international tribunal iti isyu ti hurisdiksion idi imbestigaran ti drug war nga inpatungpal ti napalabas nga administrasion.
Inbatad ni Conti a ti baro a desision ti International Criminal Court ket maysa a nalawag a senyales ti agtultuloy nga imbestigasion tapno naan-anay a maduktalan no asino dagiti dadduma pay a perpetrator wenno kadua ti dati a Presidente iti panangipatungpal ti nadara a drug war.
Kunana a daytoy ket maysa a wagas para iti posible a panagaplikar ti nayon a warrant of arrest kontra kadagiti dadduma pay a personalidad.
Inpetteng ni Conti, no adda ti sumaruno pay a maarestar kas ken ni Sen. Ronald Dela Rosa, nasaysayaat no insigida daytoy a maipatungpal.
Binalakadan ti abugado ti Senador nga isukona laengen ti bagina iti hurisdiksion ti korte ken kuestionarenna daytoy iti merito ti kaso a maipila kenkuana.
Naammoan a mabalin daytoy nga aramiden ti Senador nangruna no plano ti kampo daytoy a kuestionaren dagiti warrant a posible nga inruaren wenno iruar pay laeng ti international tribunal.
