LAOAG CITY – Ibilang ti PNP iti ili a Badoc a nasolbaren ti pannakapapatay ni Ramil Laforga ken pannakadangran dagiti dua nga annak na idiay Barangay La Virgen Milagrosa ti nasao nga ili.
Daytoy ket kalpasan ti pannakapalto-paltog dagiti aggaama idi Mayo ita a tawen.
Inbatad ti PNP-Badoc a nasolbaren ti nasao a kaso kalpasan a natiliw babaen ti bileg ti warrant of arrest ti maitudtudo a suspek a ni Clarence Bautista, agtawen iti 27, naasawaan ken residente iti Barangay Gareta iti ili a Badoc.
Segun ken ni Police Senior Inspector Joseph Tayaban, ti chief of police iti ili a Badoc, napilaan ni Bautista iti kaso a murder, double attempted murder ken comelec gun ban.
Naamoan nga awan ti nairekomendar a pagpiyansa ni Bautista para ti kaso na a murder idinto a nairekomendar ti
sag-120 a ribo a pisos ti kaso ni Bautista a double attempted murder ken 36 a ribo a pisos iti kaso na a comelec gun ban.
Iti agdama, nagtalinaed ti suspek iti kustodyar ti PNP-Badoc.
