LAOAG CITY – Naduktalan iti maysa a panagsukisok idiay Amerika a masansan a ti maad-adaan ti neurodisorder wenno kondision iti mental health ket dagiti inauna nga annak.
Basar iti maysa a panagsukisok a naiwayat idiay Amerika idi bolan ti Agosto iti daytoy a tawen, no sadinno naibasar daytoy iti panangobserbar kadagiti 10 million nga ubbing iti nasao a pagilian, naamoan a dagiti inauna nga annak ti masansan a maad-addaan ti Attention Deficit Hyperactivity Disorder wenno ADHD, Autism, Obsessive Compulsive Disorder (OCD), Tourette’s Syndrome ken allergies.
Nupay kasta, awan pay ti naiwayat a kapada a panagsukisok ditoy pagilian tapno masuportaran ti nagbalin a resulta ti sukisok ti Amerika.
Kabayatanna, kinuna dagiti eksperto ditoy pagilian a saan laeng a ti birth order ti pagibasaran no diketdi no kasano a napadakkel dagiti ubbing iti uneg pagtaenganda.
