LAOAG CITY – Saan laeng a cholesterol, high blood pressure, diabetes, ken obesity ti nasken a bantayan tapno mapagtalinaed a nasalun-at ti puso.
Basar kadagiti eksperto, napateg met ti salun-at ti utek gapu ta adda ti dakkel nga epekto daytoy iti risgo ti maaddaan ti cardiovascular disease.
Iti maysa a programa, tinalantan dagiti cardiologist, psychiatrist, faith leaders, mental health advocates ken dadduma pay nga eksperto no kasano a makaapektar ti stress, anxiety, depression, trauma ken burnout iti salun-at ti puso.
Masansan a nakapokus ti atension dagiti pasiente iti laboratory results kas ti cholesterol levels, blood pressure, blood sugar, diet ken ehersisio.
Nupay kasta, segun kadagiti eksperto, adda ti napateg a papel dagiti emosyon ken mental well-being iti pakabuklan a salun-at ti bagi.
Saan nga ammo ti naruay a doktor iti sangsangoen dagiti pasienteda a masansan a saanda nga ibagbaga dagiti negatibo a marikrikna a naurnong iti naunday a panawen.
Naammoan a no nabayagen a makapaspasar ti nakaro nga stress ti maysa a tao, ngumatngato ti tukad ti cortisol ken adrenaline iti bagi.
Iti panagtulid ti panawen, mabalin daytoy a mangitunda ti panagngato ti blood pressure, panagmaga dagiti urat ken dadduma pay a kondision a mangparparigat iti puso.
