LAOAG CITY – Naobserbaran ti apagapaman a panagngato ti kaso ti COVID-19 ditoy pagilian.
Iti datos ti Department of Health manipod idi Mayo 7 agingga 13, nakairekord ti ahensia ti 877 ti baro a COVID-19 cases iti intero a pagilian no sadino adda ti average a 125 a kaso ti naipadamag iti kada aldaw.
Adda ti 5 nga indibidual ti nakaptan ti COVID-19 ti naipadamag a pimmusay manipod idi Abril 30 agingga idi Mayo 13.
Iti baet daytoy, nagtalinaed a low risk para iti COVID-19 kadagiti amin a rehion iti pagilian.
Inpetteng ti Department of Health nga awan ti scientific basis tapno paigetan ti panagbiahe iti aniaman a pagilian gapu ta agtultuloy ti panangduktalda kadagiti kaso ken international developments.
Iti agdama, adda ti 3 a baro a variants ti sakit ti namonitor iti sabali a pagilian pakairamanan ti JN.1.18; KP.2; ken KP.3 nga amin ket descendants ti JN.1 a maysa a variant of interest.
Inbatad met ti Department of Health a kasapulan pay ti naig-iget nga assessment tapno maduktalan ti transmissibility ken kapasidad daytoy a malabanan ti immune response.
Kabayatanna, inabisoan ti Department of Health ti boluntario ken nasayaat a panagusar ti face mask, panagbuggo ti ima, panangliklik ti panagdudupudop ken nasken nga adda ti nasayaat a bentilasion.
