LAOAG CITY – Umaboten ti 7,103 ti nairekord a kaso ti covid-19 idiay Bangladesh, 163 dagiti natay idinto a 150 dagiti nakarekobre manipod iti virus.
Daytoy ti report ni Minda Salim, taga Baler Aurora ngem agnanaed idiay Bangladesh.
Inlawlawag na a kas met laeng ditoy Pilipinas a no ayan ti kaadoan ti kaso ti covid-19 ket isu met ti nakaipatungpalan ti lockdown idiay Bangladesh.
Inpakaammo ni Salim nga ado dagiti nagserra a pagtrabahoan kas ti factorya, pangopisinaan, pagadalan ken dadduma pay isut gapu na nga ado met dagiti napukawan ken nagsardeng nga agtrabaho.
Nupay kasta, dagiti dadduma nga employers ket sweldoan na latta dagiti trabahador na uray saan da nga agtrabaho ngem adda met dagiti saan nga mangsweldo kadagiti empleado na.
Ikarkarigatan met ti gobierno ti Bangladesh ti mangipaay ti tulong kadagiti residente kangrunaan na dagiti napukawan ti pagtrabahoan.
Innayon ni Salim nga immunan a nairakurak nga agpaot ti lockdown agingga intono Mayo 5, ngem saan pay a sigurado no maikkat ton ti lockdown gapu ta agdepende iti sitwasyon iti nadakamat a pagilyan.
