LAOAG CITY – Maragsakan a nangipadamag ni Barangay Chairman Elviro Agoo iti Barangay Davila iti ili ti Pasuquin gapu ta naipababa dan ti kaso ticovid-19 iti barangay da.
Inlawlawag na a manipod iti 43 nga active cases ket umabot laengen ti 23 iti agdama.
Inbaga na nga intono bigat ket malpas metten ti panag-isolate dagiti nasurok a 10 a pasyente ken mangnamnama a no makarwar aminen dagiti adda iti isolation facility a kabarangayan da ket awanen ti mairekord da pay a baro a kaso.
Inbatad na a dakkel ti naitulong ti panangipatungpal da ti total lockdown iti barangay da ken ti panangideklara ni Governor Matthew Marcos-Manotoc ti Localized Enhance Community Quarantine (LECQ) iti intero a probinsya.
Kuna na nga amin nga agwarang-warang iti barangay da ken aglabsing ti minimum health protocolas maticketan ken insapsapa da ti naipatungpal a curfew a mangrugi iti alas-siete ti rabii.
Segun pay iti kapitan, ti laeng palubusan da a makaruwar ken sumrek iti barangay da ket dagiti Authorized Persons Outside Residence (APOR) ken emergency ti pagturungan na.
Innayon na a malaksid kadakuada nga opisyal ti barangay ket katulungan da pay dagiti kameng ti Philippine National Police (PNP) iti ili ti Pasuquin.
Naamoan a ti Barangay Davila iti ili ti Pasuquin ket addaan ti nasurok nga uppat a ribo a populasyon.
