LAOAG CITY – Bimmaba ti kaso ti dengue ditoy ciudad ti Laoag ita a tawen no ikumpara iti dua a napalabas a tawen.
Basar iti City Health Office, idi tawen 2022 ket 358 ti kaso, idi 2023 ket 273 a kaso ken maysa ti natay, idinto nga iti agdama a tawen ket adda naimalditen a 68 a kaso.
Patien ti opisina nga epekto daytoy ti agtultuloy a panagkikimmayet dagiti umili nga agdalus iti aglawlaw ken pannakaiwayat ti fumigation.
Mainaig iti daytoy, nagpalagip ni Doc. Rodrigo Catcatan Jr. ti officer-in-charge ti City Health Office, a taginayunen ti agdalus ken ikkaten dagiti mabalin a pagumokan ti lamok tapno agtultuloy a bumaba ti kaso.
Naammuan a kaadwan a kaso ti dengue ditoy ciudad ket manipud kadagiti dadakkel a barangay.
