LAOAG CITY – Agtultuloy ti panagngato ti kaso ti dengue iti Western Visayas, Central Visayas, Cagayan Valley ken Calabarzon iti innem a lawas agingga idi Hulio 27.
Inbatad ti Department of Health a dagiti kaso ket ngimmato ti 33 a porsiento manipud iti 97,211 a kaso idi 2023 iti 128,834 a kaso ita a 2024.
Nupay kasta, inpalgak ti Department of Health a basbasit ti mairekrekord a matmatay gapu iti dengue ita a tawen a dumanon iti 337 maidasig iti 378 a pannakatay iti kapada a panawen idi 2023.
Naminsan manen a nagpalagip ti Department of Health iti publiko a suruten ti 4S strategy kontra iti dengue—ti Search and destroy breeding places; Secure self-protection; Seek early consultation; ken Support fogging wenno spraying kadagiti hotspot areas nangruna ita a panawen ti panagtutudo.
