LAOAG CITY – Nakairekord ti Baguio City ti 940 a kaso ti dengue manipud idi Enero 1 agingga iti agdama.
Nangatngato daytoy ti 134% maidasig iti kapada a panawen iti napalabas a tawen a 401.
Nangiyebkas ti panagdanag ni Mayor Benjamin Magalong iti kellaat a panagngato ti kaso ti dengue.
Inpakaammo ti City Epidemiology and Surveillance Unit a 70 a porsiento ket manipud idiay Baguio City idinto a dagiti dadduma ket manipud pay kadagiti dadduma a lokalidad.
Inladawan ti City Health Services Office ti panagngato iti bilang dagiti kaso ti dengue a makaalarma.
Dinakamat dagiti hotspot barangays kadagiti addaan ti adu a kaso ti dengue pakairamanan ti Irisan, Bakakeng Central, Asin Road, Pacdal, Santo Tomas Proper, Gibraltar, West Quirino Hill, Mines View Park, Middle Quirino Hill ken Victoria Village.
Naiget nga ipatpatungpal ni Magalong ti pannakaipakat ti Ordinance 66-2016 wenno ti Anti-Dengue Ordinance ti Baguio City.
Inbilinna pay ti pannakaipataw ti penalty kadagiti saan a sumurot iti dengue control measures.
