LAOAG CITY – Inpetteng ni Senator Robinhood Padilla a saanna nga ipalubos nga arestaren ti International Criminal Court (ICC) ti pada na a senador a ni Senator Ronald “Bato” dela Rosa.
Ti rakurak ni Padilla ket kalpasan dagiti report a maipagarop a nangisyu ti arrest warrant ti International Criminal Court para ken ni dela Rosa mainaig iti maipagarop a pannakairaman na iti extrajudicial killings iti war on drugs ni dati a Presidente Rodrigo Duterte.
Segun ken ni Padilla, no ti manganop iti pada na a senador ket dagiti otoridad iti Pilipinas, isuna pay a mismo ti mangitudo iti ayan ni dela Rosa.
Nupay kasta, kuna na a no gangannaet ti mangarestar ken ni dela Rosa ket saanna nga aramiden ti mangisuko kenkuana gapu ta kaipapanan daytoy a ginuliban na ti bukod a pagilian.
Immunan nga inlawlawag ti International Criminal Court nga awan pay ti inparuk-at da a public arrest warrant para ken ni dela Rosa wenno siasinno man a personalidad iti Pilipinas.
Iti baet daytoy, binalakadan ni Padilla ti kaalyado na a senador a saan a basta rumuar wenno agpakita iti publiko.
Maipalagip a naudi a nagpakita iti publiko ken simrek ni dela Rosa iti Senado idi Nobyembre ti napalabas a tawen.
