LAOAG CITY – Ngumatngato ti kaso ti kidnapping ditoy pagilian.
Gapu iti daytoy, nagballaag ni Senador Ronald “Bato” dela Rosa, no saan a masolbar nga insigida ti kidnapping cases ditoy pagilian ket sigurado a makadadael daytoy iti imahe ken iti ekonomia ti pagilian.
Inpetteng ni Dela Rosa a konektado man iti Philippine Offshore Gaming Operators (POGO) wenno saan dagiti kaso ti kidnapping ket nasken nga insigida daytoy a masolbar gapu iti dakes nga epektona iti pakabuklan iti pagilian.
Inlawlawagna nga imbes a makibiang maipapan iti pulitika ti Philippine National Police ket nasaysayaat a tutukan lattan ti nailian a pulisia ti ngumatngato a kaso ti kidnapping.
Kabayatanna, inbatad met ni Senador Sherwin Gatchalian a masapul a tutukan dagiti pannakabagi ti linteg daytoy a banag gapu iti posible a panagsubli ti kidnap-for-ransom.
Kunana a ti kasapulan ditoy ket ti alisto a tignay dagiti otoridad iti panangtiliw kadagiti adda iti likudan ti krimen sakbay pay a maminsanda manen a makabiktima.
