LAOAG CITY – Naragsakan ni Dr. Loida Valenzuela, Provincial Veterinarian iti agtultuloy a panagbaba ti kaso ti rabies ditoy probinsia.
Inbatadna nga iti agdama ket adda ti 56 a positibo manipud idi Enero agingga iti bulan ti Agosto a nababbaba iti 61.6% no idasig iti kapada a panawen iti tawen 2023.
Inlawlawagna nga adda ti 16 a kaso manipud ditoy siudad ti Laoag, walo iti ili ti Pasuquin, pito iti ili ti Burgos ken innem iti ili ti Vintar.
Kunana a kadagiti samples a naipadalan iti test ket 44 kadagitoy ket kimmagat idinto a 12 ket awan ii nakagatna.
Mainaig iti daytoy, kuna ni Dr. Valenzuela a napintas daytoy a banag gapu ta agtultuloy a bumabbaba dagiti kaso ditoy probinsia a mangipasimudaag nga epektibo dagiti addang nga ar-aramidenda.
Innayon ti Provincial Veterinarian a naiget ti pannakikoordinarna kadagiti Municipal ken City Veterinary Office a mangparnuay ti dog pound ken mangilatang ti pundo iti pananggatang iti anti-rabies vaccine kadagiti dingwen.
