LAOAG CITY – Iti panangselebrar ti World Tuberculosis Day, nangipeksa ti panagdanag ti Department of Health (DOH) iti agtultuloy a nangato a kaso ti tuberculosis iti pagilian ken naipaganetget a kasapulan ti natibtibker nga addang iti panangliklik, nasapa a panangduktal ken panangagas.
Iti panangirubuat ti The Medical City Integrated Delivery of TB Services (IDOTS) Center, inbatad ni Health Secretary Ted Herbosa nga iti baet a mabalin a liklikan ken tamingen ti sakit, nagtalinaed daytoy a dakkel a karit iti pampubliko a salun-at.
Basar iti World Health Organization Global Tuberculosis Report 2024, ti Pilipinas ket karaman kadagiti lima a pagilian nga addaan ti kangatoan a kaso ti tuberculosis iti intero a lubong pakairamanan iti India, Indonesia, China, ken Pakistan.
Inawagan ni Department of Health Undersecretary Maria Rosario Vergeire a makapadanag ti datos no sadinno a ngimmato ti 46% dagiti pannakatay nga adda ti pakainaiganna iti tuberculosis manipud idi 2015 agingga iti 2022.
Naapektaran dagiti nagduduma a grupo ti tawen, 7% ket dagiti ubbing nga agtawen ti 0-14, 61% ket dagiti lallaki manipud iti 15 ken agpangato ken 32% ket dagiti babbai iti kapada a tawen.
Inpaganetget ni Herbosa a ti panagbaba ti tuberculosis mortality iti zero inton 2028 ket maysa kadagiti kangrunaan a prioridad ti Department of Health.
Naammoan a tapno magun-od daytoy, kasapulan ti ad-adda nga epektibo ti panangduktal, napinpintas a panangagas, panangsurot dagiti pasiente ken digital monitoring tools tapno makita dagiti situasion ti tuberculosis iti pagilian.
