LAOAG CITY – Pormalen a nainanugaran ti pole vault pit iti Ferdinand E. Marcos (FEM) Memorial Stadium ditoy ciudad ti Laoag ditoy probinsia ti Ilocos Norte, Nobiembre 22, 2024.
Indauloan a mismo ni Olympian Pole Vaulter EJ Obiena ken Gov. Matthew Marcos Manotoc ti nadakamat a seremonia a nangrugi iti alas-4 ti malem.
Daytoy ti kaunaan a naistablisar a pole vaulting facility a nainanugaran ditoy pagilian babaen iti Olympian Pole Vaulter.
Inbatadna a ti gagem ti pannakaestablisar ti nadakamat a pasilidad ket tapno masuportaran ken masanay a nalaing dagiti agtutubo nga atleta ken homegrown talents iti tay-ak ti pole vaulting.
Innayonna nga agserbi ti pasilidad kas napateg nga addang tapno agbalin a globally competitive dagiti atleta a Pilipino iti ania man nga sports.
Mainaig iti daytoy, kalikagumna nga ag-recruit kadagiti agtutubo nga atleta tapnu maipaayan dagitoy ti oportunidad a makaipaay ti pammadayaw ditoy pagilian tayo a Pilipinas.
Kabayatanna, namnamaen met ni Obiena nga adda dagiti atleta manipud ditoy probinsia a makipaset saan laeng para iti Palaro Pambansa no di ket iti international competitions.
