LAOAG CITY – Ballaigi ti pannakaestablisar ti Rice Paddy Art project iti Barangay Taguid ditoy ciudad ti Laoag kas paset ti panangselebrar iti Pamulinawen Festival.
Inpakaammo ni Engr. Shiela Marie Opelac, ti mangidadaulo iti City Agriculture Office ditoy ciudad ti Laoag a ti proyekto ket dinisenyo ti Philippine Rice Institute ken inmanihir ti Laoag City Rice Cluster Farmers Association a bukbuklen dagiti miembro manipod iti innem a barangay a kas iti Barangay Tangid, Bengcag, Pila, Vira, Barangay 1 ken Barangay 2.
Kuna na a naitampok iti Rice Paddy Art project ti rupa ti local chief executive ditoy ciudad ti Laoag.
Segun ken ni Engr. Opelac, ti konsepto ti nasao a proyekto ket nainspirar iti nagballigi a proyekto ti Mariano Marcos State University (MMSU) iti ciudad ti Batac.
Mainaig iti daytoy, inpakaammo ni Opelac a ti nausar iti nasao a proyekto ket ti tradisyunal nga IR 1552 purple rice variety para iti disenyo na ken NSIC RC216 nga high yielding inbred variety para met iti green background na.
Ti ciudad ti Laoag ti kaunaan a Local Government Unit (LGU) iti Ilocos Norte a nakaestablisar ti rice paddy art project, ken mangipakita daytoy iti commitment ti ciudad iti sustainable farming.
