LAOAG CITY – Inparuk-at ti maysa a Pilipino ken Ilocano a ni Mr Aurelio Almazan a tubo iti Brgy. Cavit ditoy siudad ti Laoag ti kaunaan a social media platform nga Ayatko App.
Segun ken ni Almazan, daytoy ket namunganay nga ideya nga usaren koma laeng dagiti miembro ti pamilana tapno makapagsisinnaritada ngem napanunotanna nga pagbalinen daytoy nga accessible kadagiti amin nga indibidual.
Innayon na pay a no iti sabali a pagilian kas iti China, Japan ken Amerika ket addaandan ti bukodda a social media application, kunana a ti pagilian a Pilipinas ket adda metten ti kabukbukodanna nga Ayatko app.
Malaksid iti daytoy, impakaamo na nga daytoy nga application ket adaan dagiti features-na a tatak Pilipino kas iti Harana wenno panangi-send ti kanta iti sabali nga user.
Kunana pay a pakaseknan iti panagaramid ti account ket addaan daytoy ti limitasion aglalo kadagiti menor de edad a kas manarimaan a nabara a mapagsasaritaan ditoy pagilian no masapol a pawilan ti gobierno dagiti ubbing nga agusar ti social media.
Gapu iti daytoy, namnamaen ni Almazan a babaen kadaytoy nga application ket addanton ti maibilang a bukod a social media platform ti pagilian.
