LAOAG CITY – Nailako iti balor a $7-milyon wenno katukad ti agarup P400-M ti basketball jersey ti pimmusay a ni Kobe Bryant.
Basar iti Sotheby’s Auction idiay New York City, ti Los Angeles Lakers jersey ket immuna nga insuot ni Kobe iti pre-season ken regular season.
Nausarna daytoy iti pito nga ay-ayam manipud idi 1996 agingga iti 1997 rookie season pakairamanan ti October 16 pre-season debut ken idi November 3 regular season debut idi 1996 pakairamanan ti NBA media day-na.
Daytoy ti maikapat a kanginaan a ramit nga insuot ti maysa nga atleta.
Immuna ditoy ti jersey ti baseball star Babe Ruth a nagatang iti balor a $24-M, jersey nga insuot ni Michael Jordan idi 1998 NBA Finals a nagatang iti balor a $10.1 milyon ken ti bado ni soccer star Diego Maradona idi 1986 World Cup a nagatang iti balor a $9.3-M.
Iti Bryant collectible ket naartapanna ti $5.85-M a balor nga insuotna idi 2007 agingga iti 2008 Most Valuable season jersey.
Maipalagip a pimmusay ti five-time NBA champion iti tawenna nga 41 idi Enero 2020 idi nagsuek ti naglugananda nga helicopter kaduana ti anakna a ni Gianna ken pito a dadduma pay.
