LAOAG CITY – Inaguraran ti Department of Health ti kaunaan nga Urgent Care Center iti Ilocos Region iti ili ti Banna.
Babaen iti daytoy ket tapno maiyasideg dagiti serbisio ti healthcare kadagiti komunidad.
Indauluan da Health Undersecretary Maria Rosario Vergeire ken Ilocos Regional Director Paula Paz Sydiongco iti nasao a programa.
Ti pannakaipasdek ti baro nga Urgent Care and Ambulatory Service (BUCAS) ket dagiti mismo propesional iti medisina manipod iti Mariano Marcos Memorial Hospital and Medical Center (MMMH&MC) ti mangoperar.
Mainaig iti daytoy, ti nasao a pasilidad ket mangipaay ti Comprehensive Diagnostic Capabilities ken mangidiaya ti minor surgeries iti weekdays ken gagemna a mangipaay pay ti intermediate health facility a kalikagumna a maipadanon ti agpada a serbisio medikal iti village health centers ken higher-level hospitals.
Malaksid iti daytoy, ti Urgent Care and Ambulatory Service Center iti ili ti Banna ti maika-11 a nalukatan iti pagilian ken maikadua nga agoperar sipud idi nairubuat daytoy idi napan a Marso 2024.
Target ti Department of Health ti mangipasdek iti 28 a Urgent Care and Ambulatory Service Centers iti intero a pagilian tapno maipaay ti accessible ken de kalidad a serbisio ti healthcare kadagiti 28 a milyon a Pilipino inton tawen 2028.
Gagem ti panakaipasdek iti Urgent Care and Ambulatory Service center iti ili ti Banna ket tapno saanen nga agbiahe ti dua nga oras ken agplete ti dua a ribu a pisos tapno makadanon iti Mariano Marcos Memorial Hospital and Medical Center dagiti umili kasta pay dagiti aggapu kadagiti iti ili ti Nueva Era, Pinili ken Marcos.
Kabayatanna, iti panagbitla ni Banna Mayor Mary Chrislyn Abadilla, kunana a ti pannakaipasdek iti Urgent Care and Ambulatory Service center ket maysa a milestone iti ilida.
Innayonna a daytoy a programa ti Urgent Care and Ambulatory Service center ket mangipaay ti alisto a serbisio ken asideg a pagkamangan dagiti umili nga agkasapulan ti serbisio medikal.
Kamaudiananna, ti nasao nga aktibidad ket napirmaan ti memorandum of agreement para iti pannakairubuat ti surgical clinic ken Urgent Care and Ambulatory Service facility expansion building tapno maipaay ti kumpleto a set ti specialist treatment ken ancillary services kas iti mammogram, magnetic resonance imaging (MRI), computed tomography (CT) scan ken ultrasound.
