LAOAG CITY – Awan ti naipinal a presyo ti tabako kalpasan ti dua nga aldaw a pannakaisayangkat ti Regular Tripartite Conference iti national office ti National Tobacco Administration (NTA).
Daytoy ti inbatad ni Mr. Zaldy Alpiler, Secretary-General ti STOP EXPLOITATION.
Karaman kadagiti nagatendar iti conference ket dagiti mannalon, tobacco firms kas kdagiti cigarette manufacturers, tobacco dealers, ken exporters, kasta pay dagiti nangibagi kadagiti LGUs ditoy pagilyan.
Inlawlawag ni Alpiler nga iti uneg ti dua nga aldaw a Tripartite Conference ket makunana nga awan ti naganganab da.
Inpetteng na a kalpasan a naidasar ken nailawlawag da dagiti nagastos da a nagmula ti tabako ket kiniddaw da a manayunan ti 7 a pisos ti floor price nga 82 a pisos a presyo ti Double A a klase ti tabako.
Nupay kasta, inbatad dagiti trading centers a piso laeng ti mabalin da nga inayun iti presyo ti tabako.
Gapu ti daytoy, inbatad ni Alpiler nga inbaba da manen ti lima a pisos ti kidkiddawen da a mainayun a presyo ti tabako ngem saanen a nakadesisyon dagiti maseknan.
Innayon ni Alpiler a kiniddaw dagiti trading centers nga adalen da pay a naimbag ti kiddaw da ken maamoan ti desisyon da kalpasa ti dua a lawas.
Kabayatanna, ibilang ni Alpiler a bias ti NTA gapu ta uray ibagbaga da a dagitoy ket kakampi dagiti mannalon, madlaw iti garaw da nga ad-adda a kampian da dagiti negosyante.
Inlawlawag pay ni Alpiler a sakbay a maisayangkat ti Regular Tripartite Conference idiay Manila ket ayaban ti NTA dagiti mannalon tapno maisagana ti Cost of Production (COP) wenno pre-tripartite.
Nupay kasta, kuna ni Alpiler a saan to a daytoy ti masurot gaputa agaramid met ti NTA ti maysa a komite nga aw-awagan da ti Technical Working Committee para iti COP nga isunton ti maidasar iti National Tripartite Conference.
Inpakaammo ni Alpiler a ti panangadal ti STOP Exploitation iti uneg ti dua a tawen ket dakkel ti mapukpukaw dagiti agmulmula ti tabako gaputa nangina dagiti mausar idinto a nalaka ti presyo ti nasao a produkto.
