LAOAG CITY – Kimmapsot ti mapastrek dagiti aglaklako ti niyog iti Brgy. 5, Vicente iti ili ti Sarrat ita a tawen iti panangselebrar ti Todos Los Santos.
Segun ken ni Jeffrey Berdigo, agtawen ti 26 ken aglaklako kadagiti niyog a mariknana ti kinarigat ti panaglako da ita a tawen maidasig kadagiti naglabas a tawen gubuay iti COVID-19 pandemic.
Kunana nga uray koma man laeng ita a nangrugin ti panagbisita kadagiti miembro ti pamilia a napanen iti sabali a biag a makaabrot da ngem nakapsot latta.
Inbatadna nga iti kadaytoy koma a panawen ket adun dagiti umay aggatang ti niyog gapu ta daytoy ti kangrunaan a rekado dagiti agar-aramid ti native delicacies nga usarenda kas atang kadagiti tanem iti kamposanto.
Inlawlawag na a nagtalinaed met ti presio ti niyog da a 25 a pisos iti kada bukel ken libre nukwan ti panagpaigad kadagitoy.
Innayon na nga umdas met ti suplay dagiti niyog a manipod pay idiay Cagayan.
