LAOAG CITY – Natay ti kinalubbon ti nakamotorsiklo kalpasan a nadesgrasia iti Barangay Sta. Cruz Sur iti ili ti Badoc.
Segun ken ni P/Capt. Elison Pasamonte, Hepe ti Badoc Municipal Police Station, nabigbig ti nangiturong ti motorsiklo a Yamaha Sniper 155 a ni Mark Jewish Cargado y Anteola, agtawen ti 29, awanan asawa idinto a ti kinalubbonna a pimmusay ket ni Billy Anteola y Ricamor, agtawen ti 49, awanan asawa ken agpada a residente iti Barangay Garreta iti ili ti Badoc.
Inbatadna a basar iti inwayatda nga imbestigasion, kabayatan a dumaldalyasat ti nakamotorsiklo nga agturong nga agpaabagatan ket idi nakadanonda iti paset ti nagbedngan iti ti Badoc ken Sinait ket ditoy a nadungparda ti Stop Animal Quarantine Checkpoint signage a nangitunda ti pannakaipurwak ti kinalubbon ti nangiturong ti motorsiklo.
Gapu iti daytoy, nagsagaba ti sugat iti nagduduma a paset ti bagi dagiti dua nga insigida a naitaray iti Corpuz Hospital iti Sinait, Ilocos Sur ngem naideklarar a dead-on-arrival ti kinalubbon ti nangiturong ti motorsiklo babaen ken ni
attending physician Dr. Lorna Castillo.
Kabayatanna, inlawlawag ni P/Capt. Pasamonte a napataray ti driver ti motorsiko idi napasamak ti insidente ngem saan a nabartek daytoy.
