LAOAG CITY – Immabot ti koleksion ti Bureau of Internal Revenue (BIR) manipud Enero agingga iti Hulio 2026 iti P2.003 trillion, a nangssobra iti P1.990 trillion target para iti nadakamat a period iti P13.53 billion wenno 0.68%.
Nangatngato met ti pito a bulan a koleksion iti P102.60 bilion no idilig iti isu met laeng a period idi napan a tawen, a mangipakpakita iti 5.4% a panagdur-as ti tinawen.
Segun ken ni BIR Commissioner Charlito Martin R. Mendoza, nakaurnongen ti ahensia iti agarup 60% iti dagup a targena para iti intero a tawen 2026.
Impaganetgetna a daytoy ket mangipakita iti umad-adu a panagtungpal dagiti tax payers ken ti agtultuloy a panagregget dagiti Revenue Regions, Revenue District Offices, ken ti Large Taxpayers Service.
Iti laeng bulan ti Hulio, dimmanon iti P358.44 billion ti gross collection ti BIR, a nasobraan ti binulan a target a P336.07 billion iti P22.37 billion wenno 6.66%. Nangatngato met daytoy iti P19.41 billion ngem idi Hulio itay napan a tawen (5.73% growth).
Inbatad ni Mendoza nga itultuloyda nga ipatungpal ti lima a puntos nga adyenda ti reporma a “BIR DARES” tapno ad-adda a mapalawa ti digital services, mapasimple ti proseso ti panagbayad iti buis, ken nainget a maipatungpal ti linteg kontra kadagiti saan nga umno ti panagbayadda.
