LAOAG CITY – Nagtalinaed a comatose iti Mariano Marcos Memorial Hospital and Medical Center idiay ciudad ti Batac ni Mr. Marcelino Bangi, agtawen iti 63, naasawaan ken taga Barangay Cacafean, Marcos, Ilocos Norte.
Daytoy ti kinumpirmaran ni SPO1 Diony Balderas, maysa kadagiti imbestigador iti PNP-Marcos.
Mapalagip nga idi Abril 8 ita a tawen ket agawid koman ni Bangui idiay Barangay Cacafean a nakalugan iti motorsiklo idi aksidente a nakadinnungpar na ti maysa met laeng a motorsiklo nga inturong ni Mark Alwyn Tolentino, agtawen iti 24 ken residente met iti Barangay Pacifico iti nasao nga ili.
Naitaray ni Bangi iti ospital gapu kadagiti sinagabat na a sugat kangrunaan na iti ulo na a nangitunda ti pannaka-comatose na.
Inbatad ni Balderas a no bilang maimbagan to ni Bangi ket mabalin na a pilaan ni Tolentino iti kaso a reckless imprudence resulting in physical injury.
Nupay kasta, kuna na a no bilang sabali iti pagbanagan ti biktima ket mabalin da met a pilaan ni Tolentino iti reckless imprudence resulting in homicide.
