LAOAG CITY – Kwinestionaran ni Sangguniang Panlungsod Member John Michael Fariñas kalpasan ti panang-invalid ti Sangguniang Panlalawigan ti inlungalongna nga ordinansa maipapan iti pannakaipaay ti diskuento iti tax kadagiti business owners a mangiyempleo kadagiti maibilang a Person’s With Disability ken Senior Citizens.
Daytoy ket kalpasan a ti nagbalin a komento ti hunta probinsial ket saan a mabalin daytoy agsipod ta adda met ti linteg iti nasional maipanggep iti daytoy a banag.
Nupay kasta, inlawlawag ni Konsehal Fariñas a no iti national law ti suruten ket ti Bureau of Internal Revenue ti agsingir ti buis dagiti maseknan ngem no ti lokal a gobieno ti mangipatungapal iti daytoy ket ti Municipal wenno City Government ti pakaikkatanna ti buis.
Inbatadna a sakbayda innala ti opinyon ti Department of the Interior and Local Government ket nangipasada ti privilege speech-na, ordinansa nga inlungalongna ken ti disapproval nga inted ti Sangguniang Panlalawigan.
Kabayatanna, basar iti Department of the Interior and Local Government ket nagpokus laeng ti nasao a Konsehal kadagiti dinakdakamatna iti napalpalabas a regular session maipanggep iti nasao a banag.
