LAOAG CITY – Inistorya ni Mr. Enrico Tariga iti ciudad ti Batac ti napasamak mainaig iti pannakadungpar na ti lugan ni Sang Bayan member Telwin Tapaoan iti ili ti Marcos kabayatan ti panangitaray na ti asawa na iti ospital iti nasao a ciudad no sadinno a nakalugan da met iti binulud na laeng a kotse.
Inbaga na nga agtirtiritir ti sakit ti buksit ti asawa na isut gapuna nga intaray na iti ospital, ken idi adda da iti dalan ket inbaga ti babai a saanna a kabaelan.
Kuna na nga iti panangtalyaw na iti asawa na a nakatugaw iti likudan na ket saanna a naripar a nagsardeng ti sarsarunwen na a lugan a kukua ni konsehal Tapaoan gapu ta traffic iti sangwanan da.
Gapu iti daytoy, nadungpar na ti likud ti lugan ti konsehal ken inpagarop na nga agunget ni Tapaoan.
Nupay kasta, nagboluntaryo pay ti konsehal a nangitaray ti asawa na iti ospital idi makita na a marigatan unayen ti babai no sadinno a nakaunget pay ni Tapaoan iti guwardya iti napanan da nga ospital gapu ta ado pay laeng dagiti salsaludsuden na.
Innayon na nga idi nakapanaw ti konsehal ket nagmessage ken nakisarita a no aniaman ti naperdi iti luganna ket ikarigatan na nga iyurnungan gapu ta maysa laeng daytoy a gasoline boy.
Inbaga na a nakasangit iti sungbat ti konsehal gapu ta imbes a pagsawan na ti madi ket inreply na ti “Kumusta ni Misis mo okey na ba siya? God Bless”.
Dayawen unay ni Tariga ti kinasayaat ti konsehal gapu ta arigna saanna a pinanunot ti naperdi a paset ti lugan na imbes ket ad-adda a pinanunot na ti makatulong kadakuada kangrunaan na ti asawa na.
Mainaig iti daytoy, inbaga ni Tariga a ti ammo da ket appendix ti sakit ti asawa na ngem iti pannaka-ultrasound na ket naduktalan a lumlumteg ti bagisna isut gapuna a kitkitaen dagiti doktor no kasapulan a maopera.
