LAOAG CITY – Nag-privilege speech ni Sangguniang Panlungsod Member Jason Perera mainaig iti pannakaipawil ti panagparti ti dingwen iti arubayan ditoy siudad ti Laoag.
Segun ken ni Konsehal Perera, saan a pudno ti panangipawil ti Meat Inspection Service ti panagparti ti dingwen iti arubayan kasta pay nga awan ti national law a mangipawil met ti panagparti ti dingwen iti pagtaengan para iti personal consumption.
Inbatadna nga adda ti maysa kadagiti department head ti nangilawlawag kenkuana a saan nga iligal ti panagparti ti dingwen iti arubayan para iti personal consumption ken adda dagiti exemption daytoy.
Inlawlawagna a saanna a kayat a maapektaran wenno maiwalin dagiti nagbalin a tradision ken kultura a natawid manipud kadagiti kaputotan gapu laeng iti naputar nga ordinansa.
Maipalagip a naduktalan ni Konsehal Perera nga awan ti national law a mangipawil ti panagparti ti dingwen iti arubayan wenno backyard slaughtering.
Rakurak daytoy ni Perera kalpasan nga inaprobaran ti konseho ditoy siudad ti Laoag ti maysa nga ordinansa ni Konsehal Kiko Ang a masapul a dagiti four-legged a taraken kas ti baboy, kalding ken dadduma pay ket maparti amin iti slaughterhouse uray dagitoy ket personal consumption laeng.
Immuna iti daytoy, ti nasao nga ordinansa ket inaprobaran metten ni Mayor James Bryan Alcid ditoy siudad ti Laoag.
