LAOAG CITY – Indatag ni Sangguniang Bayan Member Marvin Pascua iti Sangguniang Bayan iti ili ti Solsona dagiti ebidensia a posible a mangitudo iti pakabigbigan iti likudan ti dummy account nga Akron Hammer.
Segun kenkuana, indatagna ti telephone conversation-da iti nasao a dummy account no sadinno ket adda ti atapenna nga indibidual nga isuna ti adda iti likudan ti nagan nga Akron Hammer.
Nupay kasta, inlawlawagna a manarimaan pay laeng ti naiget nga imbestigasionda maipapan iti nasao a banag tapno mapaneknekan a pudno ti atapda nga isu ti agar-aramid iti pammerperdi kenkuana.
Inbatadna nga adda ti naawatna a mensahe maipanggep iti dummy account a rumrummuar nga agbabbabawi daytoy kadagiti inaramidna kenkuana.
Kunana a maibasar iti nagbalin nga obserbasionna kabayatan ti telephone conversation-da ken ni Akron Hammer ket arig familiar ti timek kenkuana.
Gapu iti daytoy, inpalgak ni Konsehal Pascua nga ad-adda pay a nakarikna ti gagar a mangiwayat ti naun-uneg nga imbestigasion tapno masigurado ti kinatao ti agus-usar iti dummy account.
Maipalagip a nagikkat ni Pascua iti Team De Lara gapu ta maipagarup nga isuna ti mapabpabasol nga adda iti likudan ti dummy account a mangperperdi iti Team De Lara.
Immuna iti daytoy, mamati ni Mayor Joseph De Lara nga adda ti maris pulitikana ti pammerperdi iti grupona babaen ti nasao a dummy account.
