LAOAG CITY – Inlawlawag ni Sang Bayan member Marvin Pascua iti ili ti Solsona no apay a nagdesisyon nga agbalin laengen nga independent.
Ni Pascua ket napinget a kapartidoan da Mayor Joseph de Lara ken Vice Mayor Jonathan de Lara ngem gapu iti naaramid a dummy account nga addaan ti nagan nga Akron Hammer ket nagbaliw ti sitwasyon a nagresulta ti nakisinaan na manipod iti grupo da.
Segun ken ni Pascua, adda dagiti nagidanun kenkuana nga isuna ti atapen wenno tudwen ti grupo da nga adda iti likudan ti dummy account.
Ti nasao a dummy account ket agipopost kadagiti saan a maiparbeng ken makadadael iti grupo da.
Kuna na nga iti baet a naiget a naglikudan na ti alegasyon ken inpasingked na a saanna a maaramid ti agaramid ti dummy account tapno perdien dagiti pada na nga opisyal, ngem maipagarop a saan latta a mamati dagiti maseknan isut gapuna a nagdesisyon laengen nga umikkat iti grupo da.
Inpalgak na pay nga awan pulos ti makitana nga aksyon dagiti kakadwa na wenno ti lider da tapno pagsasaritaan da a naimbag ken urnusen ti nasao nga isyu isut gapuna nga ad-adda manen a timmibker ti pangngeddeng na a makisinan iti grupo da.
Innayon na a maawatan nan no apay nga isuna latta ti itudo dagiti maseknan nga adda iti likudan ti dummy account, daytoy ket tapno madadael ti nagan na kadagiti tattao kangrunaan na ket umadanin ti eleksyon.
Mainaig iti daytoy, kuna na a ti pagsayaatan na ti panagbalin na nga independent ket maaramid na ti bukodna a desisyon.
