LAOAG CITY – Inlawlawag ni Sang Bayan Member Efren Valdez iti ili ti Paoay no ania ti nangiduron kenkuana a nag-Privilege Speech ken pinaulwan na ti “INEC kinuryente nakami”.
Inbatad na a sakbay a nagbitla ket inadal na a naimbag ti
Advisory ti Energy Regulatory Commission (ERC) nga addaan ti magna carta a nakaibinsa-binsaan dagiti pagannurutan a masapol a suruten ti Ilocos Norte Electric Cooperative (INEC) kabayatan ti covid-19 Pandemic.
Inbaga ni Valdez a saludaran na ti nagbalin a ganuat ti INEC mainaig ti saan a panagbayad pay laeng dagiti member-consumers ti bill da idi Marso agingga iti Abril.
Nupay kasta, iti inpaay nga estimated bill ti INEC idi Mayo 1 agingga iti Mayo 6 ket nakakigtotan met dagiti member-consumers gapu iti kinadakkel na.
Inpetteng ni Valdez a masapol koma nga intono laengen Mayo 16 a mapan ag-reading dagiti kameng ti kooperatiba ken uray duan a bolan a saan a nakabayad dagiti member-consumers, ti napateg ket masigurado a saan a patpatang ti nakonsumo ti kuryente.
Inadmitir pay ni Valdez a kumbinsido iti naibaga ti INEC a ti sobra ti estimated bill dagiti member consumers ket maikkat to iti sumaruno a bill da ngem kuna na nga adda ti panagamak na amangan no saan wenno mabayag sakbay a maisubli kas ti napasamak iti naglabas a panawen.
Kabayatanna, nagyaman ni Valdez gapu ta inaprubaran met dagiti kakadwa na iti konseho ti panagimbitar da iti siasinno man a personnel ti kooperatiba a mangilawlawag ti pakaseknan da iti sumaruno a session da intono Lunes, May 18.
Malaksid iti daytoy, kiniddaw pay ni Valdez ti pannakaipasa ti resolusyon iti konseho para iti pannakapapigsa ti privilege speech na a maipasa iti INEC tapno adalen da ti posibilidad a pannakaipaay ti naan-anay a panawen kadagiti member-consumers nga agbayad ti bill da manipod iti Abril agingga iti Mayor ti mamin-uppat a bansada nga awan pulos ti interest na.
