LAOAG CITY – Patien ni Vice Mayor Meynand Francis Bumanglag iti ili ti Pinili a nagun-od da ti 1st Place iti Provincial Local Legislative Award 2023 gapu iti panagkikinnamayet ti Legislative family ken dagiti staff da.
Inlawlawag ti bise mayor nga uray agrabrabii da nga agtrabaho ket awan ti agreklamo kadakuada.
Kuna na a mabalin a ti maysa pay a nagballaigian da ket gapu iti kinapudno da iti amin a transaksyon da kas kadagiti iyus-uswat da a public hearings, committee meetings ken dadduma pay .
Mainaig iti daytoy, nagyaman ni Bumanglag iti Legislative family ken kadagiti staff da, pakairamanan ti sibubukel a lokal a gobierno iti ili ti Pinili, kangrunaan na ken ni mayor Rommel Labasan. Inpaganetget ti bise mayor a saan da a maaramid amin dagitoy no awan ti suporta ni Mayor Labasan.
