LAOAG CITY – Kinumpirmaran ti National Bureau of Investigation a nangisyu ti commitment order ti maysa a korte iti Maynila tapno ibilin kadakuada a maiyakar ni dati a Congressman Arnolfo Teves Jr. iti pagbaludan ti Manila City Jail.
Daytoy ti inrakurak ti agdama a direktor ti ahensya a ni Retired Judge Jaime B. Santiago iti naiyuswat a taripnong.
Iti agdama ket adda iti kustodiyar ti National Bureau of Investigation ni dati a congressman Arnie Teves Jr. kalpasan ti pannakaideportar na manipod iti pagilian a Timor-Leste.
Nupay kasta, kuna na a nagduduma a korte ti Maynila ti addaan ti iggem kadagiti sangsangwen a kaso ti dati a kongresista isut gapuna nga inpa-hold da paylaeng ti nasao a pammilin.
Gapu iti daytoy, inbatad ni Santiago iyur-uray da no ania ti agbalin a pinal a desisyon iti insumitir a mosyon ti kampo ni Teves a consolidation dagiti kaso.
Innayon na a ditoy da a maamoan no sadinno ti pakaiyakaran ti dati a kongresista isut gapuna nga inbilin na paylaeng iti warden ti nasao a detention facility a saan da paylaeng nga iyakar ni Teves agingga nga awan ti pinal a resolusyon.
Kabayatanna, naituding a maidatag iti arraignment ti dati a kongresista iti Manila Regional Trial Court Branch 12, ita a bigat.
