LAOAG CITY – Pimmusay bayat a mag-agasan iti Adventist Hospital iti ili ti Pagudpud ti maysa nga ama idinto a agpapaimbag ti anak na gapu iti pannangan da iti botete.
Binibig ni P/C/Insp. Lawrence Ganuelas, Hepe ti Pulisya ti nasao nga ili ti ama a ni Rizalino De lacruz, agtawen ti 35, maysa a mangngalap ken ti anak na a ni Arjay Dela Cruz, agtawen ti 13, residente iti Bgy. 1.
Segun ken ni Ganuelas, napan nakipagkalap ti ama ket ti binglay na ti inaramaid na a pulutan ,maysa ditoy ti botete.
Kuna na nga idi rabii, ket nagaramid ti pulutan, kalpasan ket inayaban na dagiti karruba na a lallakki ket naggi-inum da.
Inlawlawag ti opisyal a ti pinulutan ti biktima ket ti bugi ti botete ken uray ti anak na idinto a dagiti kakadua na ket ti lasag na.
Ket bayat ti panaggiinum da, nakadlaw ti panagsakit ti ulo dagiti agama isu nga intarayda iti nasao nga ospital idinto a ti ubing ket iti Mariano Marcos Memorial Hospital and Medical Center idiay ciudad ti Batac.
Naamuan ni Ganuelas a saan la nga ita nga agpulutan ti botete dagiti maseknan ngem posible a naranaan dagiti biktima ti toxic ti nasao a klase ti ikan rason a napasamak ti nasao nga insidente.
