LAOAG CITY – Nagbalin a nabara ti deliberasyon iti Kamara de Representantes mainaig iti kiddaw a makita ti sububukel a financial picture ni Vice President Sara Duterte, partikular ti panangiparuk-at ti subpoena para kadagiti negosyo ken law firm a maikonkonektar kenkuana.
Gagem ti gakat a mabukitkitan ti kinabaknang ti bise presidente sipud nangrugi daytoy iti public office kas bise mayor idi 2007 agpapan ita.
Segun ken ni Bicol Saro Partylist Terry Ridon a nangilungalong ti mosyon, sakopen ti imbestigasyon ti kumpanya a nakarekord iti 2023 ken 2024 Statement of Assets, Liabilities, and Net Worth (SALN) ti bise presidente, karaman ditoyen ti Geometry, Security, Anyanan Shores, ken Cable Tow.
Kinontra met ni Cagayan de Oro Representative Rufus Rodriguez ti nasao nga addang ken inawagan na ti panagdengngeg kas maysa a fishing expedition.
Kwinestyunaran na no apay a mapatuludan ti subpoena ti maysa a law office tapno maipagarop a mabalin a maapektaran ti privilege communication iti nagbaetan ti abogado ken kliyente.
Insungbat met ni Ridon a saan a sakopen ti imbestigasyon dagiti pribado a panagsasarita wenno ti kaso dagiti kliyente ti law firm.
Innayon na a dagiti laeng dokumento a maisumsumitir iti Securities and Exchange Commission (SEC) kas ti audited financial statements ken general information sheets ti kidkiddawen ti komite tapno makita ti financial output na.
Kuna na pay a napateg a maala dagiti nasao a dokumento tapno maiberipikar ti panagngato ti net worth ti bise presidente a masansan nga irasrason dagiti supporters na kas napastrek na manipod kadagiti nasao a negosyo ken law firm.
