LAOAG CITY – Inpakaammo ni Ms. Ami Go, ti maysa a Kung Hei Fat Choi Expert a napintas ti panagserrek ti Chinese New Year ita a tawen 2024.
Segun kenkuana, ita a tawen ket maaw-awagan a Year of the Dragon no sadino mangipasimudaag ti goodluck, prosperity ken wealth iti maysa a tao.
Inbatadna a maysa kadagiti nakadawyan nga ar-aramiden a tradision dagiti tsino ket ti pananggatang kadagiti 12 a pedaso a nagbubukel a prutas a maidasar iti lamisaanda malaksid laeng kadagiti dadduma pay a makan a pagsasangoanda.
Kunana a swerte ita a tawen ti panagserrek ti negosio ken trabaho idinto nga iti bassit ti gasatna ket dagiti naipasngay iti Year of the Dog no sadino kasapulanda nga agisuot iti aniaman a klase ti jade iti bagida ken mangikabilda ti tissue a mangipaay ti proteksion para iti prosperity ken pampaikkat ti negative vibes.
Inlawlawagna a no adda ti problema iti negosio ket mangikabil ti maysa a piyao iti sango ti ridaw para iti proteksion ken malisian dagiti negative vibes.
Mamati ni Ms. Go a saan a mabalin ti agdalus iti pagtaenganda agingga a saan pay a nalpas ti pannakaselebrar ti Chinese New Year gapu ta ibilangda daytoy a malas.
Kabayatanna, naammoan nga inarak dagiti kostumer iti puestoda kas pammati dagitoy a mangited ti swerte wenno gasat iti biagda dagiti gatangenda a bracelet kadakuada.
